Dorezohet Xhani, nuk ka para. Partizani, me te rinjte ne fushe

Dorezohet Xhani, nuk ka para. Partizani, me te rinjte ne fushe

Dorëzohet më në fund Albert Xhani. Pasi ka provuar për muaj të tërë të menaxhojë situatën kaotike te të kuqtë nëpërmjet “diplomacisë”, ditën e djeshme ka zgjedhur një mënyrë krejt origjinale për të deklaruar se nuk ka më para për të shlyer detyrimet ndaj lojtarëve. Këtë e ka bërë nëpërmjet “sms”-ve të dërguara në telefonat e gazetarëve. Fjalët më të përshtatshme për një rast të tillë janë një lloj “falimentimi alla shqiptar”, që nuk është i deklaruar zyrtarisht (një shoqëri falimenton, nëse për 3 vite radhazi deklaron bilance me humbje). Ndërsa në rastin konkret, Xhani ka bërë të ditur se është i gatshëm të heqë dorë nga lojtarët e papaguar, por jo nga klubi.

Mesazhi

“Natyrisht që kemi vështirësi, e cila po ndihet jo vetëm te ne, por në të gjithë rruzullin. Nuk duhet të justifikohemi, por në këtë realitet u bëjmë thirrje lojtarëve dhe stafit që të na mirëkuptojnë sa kanë mundësi, nëse na besojnë e shpresojnë. Të vazhdojmë të punojmë të gjithë së bashku për t‘u bërë pjesë e zgjidhjes dhe për të dalë nga kjo gjendje, e cila duhet menaxhuar me kujdes e vendosmëri për ta kapërcyer këtë situatë. Gjithçka tjetër, jashtë këtij realiteti me ngjyrime dashakeqëse, me qarje për dashurinë e madhe që kanë për Partizanin, nuk do të kishte vlerë. Prandaj, kush ka mundësi të kontribuojë për t‘u bërë pjesë e zgjidhjes së problemit, të rrijë me ne e të vazhdojë punën. Kush nuk ka mundësi, e respektojmë dhe ndahemi, duke u mirëkuptuar për vendimin që do marrë. Si president i këtij klubi kam marrë për 10 vjet e në vazhdim përgjegjësi dhe sakrifica jo të vogla, por të mëdha, u kam dhënë e do t‘u jap zgjidhje problemeve. Shpresoj që do të kem njerëz, të cilët do të binden dhe do të më mbështesin”, ishte ky mesazhi i Xhanit. Trajneri Duro nuk dinte asgjë dhe gjithçka e ka mësuar nga gazetarët.

E ardhmja

Sipas një të përditshmeje sportive, drejtori teknik i të kuqve, Bejkush Birçe, ka pohuar se Xhani ka pranuar pamundësinë financiare për t‘i mbajtur lojtarët, për t‘i shlyer ata, për sa u takon rrogave të prapambetura, të paktën për momentin. Madje Birçe pohon se e ka pyetur Xhanin: Çdo të bëhet me këtë skuadër, kur lojtarët po ikin dita-ditës, ndërkohë që kampionati është te dera? Xhani i është përgjigjur: “Nuk mund të mbajmë njeri me zor. Le të ikë kush të dojë, le të rrijë kush të dojë”. Kësaj përgjigjeje të Xhanit, Birçe i ka shtuar aty për aty pyetjen: “Po Partizani, me kë do të luajë në kampionat atëherë, me mua dhe trajnerin Duro, se lojtarë nuk ka”? E menjëhershme ka qenë kundërpërgjigjja e presidentit: “Do të luajë me të rinjtë. Partizani nuk shuhet, ka akademia plot lojtarë”. Deri tani nga klubi ishin larguar Hallaçi, Kalari, Ngjela e Shala, ndërsa tashmë rruga e largimit është e hapur për të gjithë të pakënaqurit. E ardhmja e Partizanit mund të mbështetet te të rinjtë e akademisë. Rikthimi në Kategorinë e Parë duket më shumë se i besueshëm. Por në fakt, nëse një president nuk ka para, kush duhet të iki: vetë presidenti, apo skuadra në kategorinë inferiore? Ligjërisht, ndoshta Xhani ka të drejtë, por moralisht këto pyetje duhet të marrin përgjigje në ditët e ardhshme, kur edhe mesazhi i “sms”-së së Xhanit të gjykohet me më shumë qetësi.

Burimi: Gazeta Shqip