Ekonomia në krizë, zbulohet skema piramidale në SHBA

Një tjetër mashtrim financiar ka tronditur Shtetet e Bashkuara të Amerikës, në të njëjtën ditë kur presidenti Obama firmosi në ligj paketën prej 787 miliardë dollarësh për stimulimin e ekonomisë. Autoritetet e kontrollit të bursës kanë zbuluar mashtrimin e manjatit teksan Robert Allen Stanford dhe tri kompanive të tij, “Stanford International Bank” me qendër në Karaibe, “Stanford Grup” në Hjuston dhe “Stanford Capital Management”. Bëhet fjalë për një skemë piramidale investimesh mbi certifikatat e depozitave mbi 8 miliardë dollarë, të cilëve ai u kishte garantuar të ardhura të majme. Autoritetet kanë pezulluar përkohësisht aktivitetet e Stanford-it, i cili gjendet në vendin e 205-të të klasifikimit të revistës “Forbes” të njerëzve më të pasur të botës, me një pasuri prej 2.2 miliardë dollarësh. Me këtë zbulim rëndohen përmasat e krizës së thellë ekonomike që ka goditur Shtetet e Bashkuara. Industria e makinave në këtë vend vazhdon të kërkojnë ndihmë duke shtuar kërkesën për para. “Krysler” dhe “General Motors” kanë paralajmëruar se vështirësitë me të cilat po përballen janë të mëdha e do të shkurtojnë dhjetëra mijëra vende pune.