Shefer: “Bombardimet në Serbi në 1999-n ishin të domosdoshme”

Shefer: “Bombardimet në Serbi në 1999-n ishin të domosdoshme”


Sekretari i Përgjithshëm i NATO-s, Jap de Hop Shefer, ka deklaruar në dhjetëvjetorin e ndërhyrjes së NATO-s në vitin 1999 në Serbi se kjo ndërhyrje ishte e domosdoshme për të parandaluar katastrofën humanitare që po ndodhte në Kosovë. Shefer, duke folur në forumin transatlantik në Bruksel, tha se pavarësisht kritikave të bëra, bombardimet në Serbi ishin të nevojshme. Edhe ambasadori amerikan Riçard Hollbruk është shprehur se sulmi ajror i NATO-s kundër ish-Jugosllavisë, një dekadë më parë, ka qenë veprimi i duhur që ka përmirësuar jetën e shqiptarëve të Kosovës dhe të vetë serbëve. Duke folur në konferencën Forumi i Brukselit, Hollbruk kujtoi kohën kur një dekadë më parë i kishte dhënë ultimatumin final Sllobodan Millosheviçit, që duhej të zgjidhte mes pajtimit dhe bombardimit. “E kujtoj dhe mendoj se ndonjëherë është e domosdoshme të përdoret forca dhe rezultati ishte i mirë në fund”, - tha Hollbruk, aktualisht i dërguari amerikan për Afganistanin dhe Pakistanin. Ndërsa ministri serb i Mbrojtjes, Dragan Sutanovaç, deklaroi se opinioni i tij nuk kishte ndryshuar asnjëherë. Sipas tij, nuk është e natyrshme që një komb të bombardohet dhe se NATO-ja mund të kishte arritur qëllimet e saj duke harxhuar më pak energji dhe duke kursyer jetën e njerëzve. Bombardimet e NATO-s mbi ish-Jugosllavi nisën më 24 mars të vitit 1999.

24 Mars 2009

normal qe ishin te d.m.d.keto bombardime,pasi duhej t'i pritej dora gjakatare e serbit,m.gj.s. shume keq me vjen per popullin serb,pasi e pati peshqesh kete lufte nga politika e keqe e qeverise se tij.